買二手電動車中伏？車尾凹咗銷售都話花痕咋！

以為去 Showroom 買「經理車」、行咗幾千公里好新淨，就萬無一失？

今次有車主分享，買車時 Sales 口頭保證「只係普通經理代步車、輕微花痕」，仲要求「未攞車就要付清全數先得過戶」！
結果車主比晒錢之後，仔細一睇先發現：
車尾有幾條極深嘅花痕、甚至有少少凹咗進去，膠邊移位！問 Sales 居然只係話「廠做得唔好」，隻字不提有冇撞過！事後問維修紀錄同電池健康度，車行更加係「提供唔到」……連屋企人同朋友都質疑，最後連 AI 都叫佢一定要搵專業驗車！

朱生（HKMI 負責人）提醒買家兩大盲點：
盲點一：未攞車先付全數？
新車落訂係常態，但未驗車、未交車就比晒全數，主導權就完全喺車行手上！如果遇到問題，想退訂退款就難上加難！
盲點二：口頭承諾≠文字合約！
Sales 口頭講到幾咁好聽（例如「冇大撞、幫你打蠟搞返好」），但如果冇白紙黑字寫入買賣合約，法律上根本冇保障！合約冇寫，就等於冇保證！

驗二手電動車一定要睇：

1. 車身結構： 撞過嘅車就算唔使錢送比你都唔好要，日後安全隱患極大！
2. 車底電池板： 檢查電池外殼有冇凹陷或刮花，因為電池損壞會嚴重影響效率甚至帶來安全風險！
3. 水浸風險： 之前落大雨「一換一」收返嚟嘅車，隨時有機會係水浸車！

買二手車，切勿盲目相信銷售口頭承諾！
【先驗車，後落訂】