壹周刊訪問 [買賣二手車貼士]



買賣二手車經常出現糾紛,有讀者買二手車,落訂後驗車卻發現車身曾捱撞維修,要求退訂取消交易,但車行企硬「殺訂」,驗車專家點出買車三大貼士,助讀者安心買二手車。
劉先生五月底在二手車網「 28Car」看中0六年出廠的二手 SUBARU LEGACY B4五人車,於是以自己○二年出廠之寶馬 MINI,再加十萬元車換車。買車前經紀曾指,若驗車後發現車曾遭嚴重撞擊(大撞)、水浸或是由不同車輛車身散件組裝(俗稱積木車)可退款,劉聞言便安心付二萬元訂金。
事後他找驗車公司驗車,卻發現車身散熱器支架(龍門架)曾作銲接及拉正修理,劉先生認為此已代表車身曾「大撞」,要求退訂,對方卻指:「○六年(出廠)車,碰碰撞撞總會有,咁樣唔算大撞,冇得退。」由於事前未有定義何謂「大撞」,最終淪為「口同鼻拗」,爭議遲遲未能解決。
[貼士一 未驗車不應落訂]
香港驗車有限公司負責人朱祖恩指,二手車賣家要求買家落訂,若取消交易亦可殺訂,然而,不同車行對「大撞」、「水浸」、「積木車」定義不同,買家不應輕信車行承諾:「可能你覺得係大撞,佢(車行)話唔係,咁就真係口同鼻拗……總之未驗車前千祈唔好落訂。」即使買家極想購得心頭好,必須落訂留車,最多只應付約一千元或車價的十分一作訂金,萬一遭殺訂亦可減低損失。

[貼士二 對牌簿查來歷]
拉開車尾膠邊,可見車尾曾作銲接等維修(紅圈示),反映車尾曾捱撞。(王偉洪攝)
購買二手車,買家有可能遇上來歷不明的車,故交易時須先核對賣家身份與牌簿登記人是否相符,若不能出示正本記錄,即「賣家」並非真正車主,或者該車仍在供車會中,牌簿屬財務公司抵押品,兩種情況亦不宜交易,買家亦應以本票交易,以確保付款予牌簿上的「真正」車主。
[貼士三 慎選驗車公司]
朱祖恩又指,消費者買車前可委託獨立驗車公司作檢驗,避免幫襯賣家委託的車行,以免對方「打籠通」,影響驗車報告的可信性。一般驗車公司會先檢查引擎有否損壞,再以塗層分析儀,檢查汽車不同位置的塗層厚度,若不同位置讀數相距數十倍,即表示該車可能曾維修,曾重新噴油。買家亦可以自行作簡單檢查,例如拉開車尾及車門的膠邊,觀察車身有否翻新痕跡。