【搵車快線】首創流動驗車服務 為汽車買賣把關



【搵車快線】首創流動驗車服務 為汽車買把關

「其實『香港驗車』唔應該存在喺呢個社會,驗車係一個好畸形嘅產物,『香港驗車』存在喺汽車買賣嘅行業上,係做一個監察者嘅角色,全因為人與人之間冇咗信任。如果我買部車,我信任你,根本唔需要驗車。」這盤被創辦人兼行政總裁朱祖恩形容為無心插柳的生意,現每月營業額已近百萬,他推出的流動驗車服務,更成為香港驗車服務的先驅。

朱祖恩說:「車行當然希望賣出去嘅車冇問題,但我哋只係如實反映畀買家知。買車之前做檢查,可令買方知道架車嘅現況,先決定買唔買。保障到消費者之餘,亦保護到道路使用者嘅安全。」
朱祖恩是創辦人兼行政總裁,他標榜「香港驗車」是唯一一間沒有車行資金,不受車行操縱,保障消費者買車的香港人驗車公司。「驗車公司唔係法定監管機構,呢份只係簡單嘅良心報告,我哋只係將車嘅現況,話畀想買呢部車嘅人知道,再決定買唔買。」

驗車只需早1、2天預約,每部車收費$1,300起,超級跑車收$2,000。朱祖恩表示買賣雙方均需在現場,驗車時首先會看車身、車底有沒有被撞過、駁過及損耗,並進行引擎燃燒及波箱測試等。整份報告會提及3百多個項目,基本上可驗都驗,但不會拆開去驗,以免二手車部件受損。

剛開業時,朱祖恩要讓消費者明白驗車的好處,向消費者宣揚「先驗車,後買車」這個概念。當時一般車友以為驗車要到車房上架,但朱祖恩首推流動驗車。「最初開業,唔想負擔貴租,就用流動車到現場即場驗車,會到停車場、車行或車房,買賣雙方都感到方便。」

與車行對立

朱祖恩說驗車公司是在車行的對立面,還試過起衝突,如在10年,朱祖恩有次到長沙灣驗車,發現部車有地方被焊接過,「車行有人走過嚟講粗口,話我哋將部車冇事話有事,更用電話影我相。我同佢哋講:「網上有我相啦,你咁小朋友㗎,部車有事就有事啦!」後來朱祖恩亦接過某車行的電話,說給他一筆錢,要求寫他們的車沒事,但他斷言拒絕。

今年49歲的朱祖恩,因小時候父母仳離,要靠綜援生活,故他對政府一直心存感激,很想長大後能夠回饋社會。中學時,他受當時立法局議員吳明欽老師的影響,開始做地區工作服務基層。90年,21歲的朱祖恩更到良景區參選區議會,成為當年全港最年輕的候選人。「當時良景邨同好多屋邨一樣,有漏水嘅情況,但良景邨係少數能夠獲得傳媒報導,並得到房署積極回應嘅屋邨,問題得到根治。有以上嘅功績,令市民相信一個年輕人係有能力、有心去服務街坊,所以僥倖地得到佢哋嘅認同而當選。」

做議員兼賣保險

當年朱祖恩邊做區議員,邊在樹仁學院修讀社會學,一年後肄業投身保險,旋即在92年勇奪新進推銷員獎。「我同時兼顧區議員嘅工作,連任兩屆加上臨時區議會直至00年,但卸任後依然有服務舊街坊。保險訓練到自己嘅戰鬥力及唔怕失敗嘅能力,亦練到銷售技巧及建立人際關係,認識到各行各業嘅人。」

保險亦啟發朱祖恩開創驗車生意。「06年,我有位朋友喺澳洲返嚟,問我喺香港應該搞乜嘢生意好。當時我冇頭緒,喺傾談中講到自己嘅買車經歷,上車網花3萬買咗部私人轉讓車,後嚟去車房換油,師傅話部車嘅車頭有焊接過嘅痕跡,係一部積木車,我打電話已經搵唔到前車主,電話係太空咭,擺明詐騙。呢件事啟發到我哋做驗車生意,好似客人買保險要先驗身,係為咗檢測佢嘅健康情況,如果情況唔許可,保險公司有權拒絕呢份保單,或者要加保費。」

同年,朱祖恩與拍檔成立「香港驗車」,他們希望用另一個身分來服務市民,「我做保險時年薪已過百萬,所以經營『香港驗車』,我只想做獨立第三方,為消費者把關,唔求賺大錢,只求慢慢做到收支平衡,不過頭兩年已經達成目標。」現「香港驗車」每月營業額已近百萬。

現時「香港驗車」在中環設置call center,朱祖恩說最新會與www.dreamcar.com.hk合作,讓車主驗車後,將驗車報告也一併放在平台上,為買家提供更佳保障。
由一架車,一位師傅開始,到現在擁有8位師傅連8部車,朱祖恩說:「請人時,我哋會做嚴格嘅人格審查,通常只會由職員介紹。如果應徵者之前係賣車,我哋唔會請;如果佢係做車房,我會了解呢間車房嘅背景、佢嘅生活圈子及家庭背景等。」開業12年來,「香港驗車」只出現過一位師傅,因操守出現問題,被勒令即時離開。「嗰次係透過我哋定期嘅spot check及神秘顧客去揭發。」

驗屍咁驗車友buy

初開業時,朱祖恩已經主力透過網上宣傳及做到口碑相傳。「當時有唔少人喺網上買賣二手車,喺車網落廣告嘅效果最理想,接到好多電話問我哋點樣驗車。買家搵我哋驗車,見到好似驗屍咁驗,就會介紹畀朋友;賣家可能唔滿意,但轉換角色到佢買車時,亦會搵我哋驗車。」

「香港驗車」分別在11年、12年及15年,首創翻驗、驗輻射及驗新車服務。「買新車唔代表部車係完美無瑕,新車由原產地出廠至交畀車主,喺運輸途中,有機會被碰撞或碰花,所以新車都要驗。翻驗係第一次驗車後,未能即時將車拎走嘅車主而設。有啲車主擔心福島地震嘅核洩漏影響到日本車,我哋就推出驗輻射服務。」

車行由仇恨變接受

朱祖恩表示很多車行對「先驗車,後落訂」,由以往的仇視到現在接受,「以前想去開一開車門都要落訂,現在只係老一派嘅車行會咁做,但新派車行就可以畀客人先免費驗車,需要收1千留車費。」

4、5年前,曾有國內基金、機構找「香港驗車」到內地發展,朱祖恩說:「目前仲未發展內地市場,原因喺我哋未遇到一個同我哋有一樣理念嘅合作夥伴,所以寧缺莫濫。」

香港驗車
電話:2588 1822 

http://www.hkmi.com.hk/media/motor-quick-search/

資料來源: http://s.nextmedia.com/magazine/r.php…