2009【蘋果日報】轆 Book:4招傍身做驗車達人



潮流興網上二手車交易,超方便嘅同時,又附帶唔少擔心。擔心部車有「隱疾」、擔心前任車出蠱惑掩眼法,以致興高采烈買部「新」車,轉頭就發現呢度爛、嗰度爛,呢邊漏水嗰邊又漏油。破財事小俾人搵笨就最㷫。就等驗車達人、「香港驗車」嘅 CEO Chris,教大家免做老襯嘅 DIY驗車基本功喇!

記者:梁美甜
攝影:伍慶泉
Model: Ayu
鳴謝:香港驗車有限公司(25881822)

■ Chris指車門位置有橙皮紋,原來要好小心先睇到。

招數1 繞場睇外殼

貼切啲講係繞車一周,咁樣做其實好重要,「大家要嘗試喺唔同角度望真車身,睇吓頭尾冚線條係咪對稱、車漆有無新舊色分別又或者起橙皮紋。好似頭冚咁,若然兩邊唔對稱即係框架曾經扭曲又或者受力,好有機會係撞過又或者損毀過喇!」明白。「另外睇吓煞車皮夠唔夠厚,更重要係,記得用手摸一摸煞車碟,如果凹凸起坑就代表隻碟到期要換喇!」最後就係簡單睇吓輪胎有無披散、胎紋夠唔夠深、尾喉有無老化氧化、燈罩有無鴛鴦色等。

 

 

 

■正常情況下,頭冚兩邊罅隙位要對稱,否則就好可能係曾經撞過。 ■新輪胎胎紋足8mm,二手車多為4mm,不足4mm隨時要換新胎。 ■ Brake碟會睇到有紋,但若摸上手都感覺有凹凸坑紋,就代表碟面磨蝕。

招數2 睇駁口睇螺絲

打開頭冚及尾箱檢查車身駁位嘅膠邊係咪同色順滑,差別很大的話,就有可能曾經損壞過,當然檢查一下螺絲位有無花痕又或者顏色是否相符都可以評估到車身有無撞過。

 

 

 

■螺絲位有花痕就有可疑,呢粒就又靚又光滑,無問題! ■原廠駁位大多無接口、膠邊亦係同色而順滑,就如呢幅相見到咁。

招數3 揭冚睇偈

睇完外觀就要開頭冚檢查入面副偈同零件靚仔度,「留心一下 Cam帶同皮帶係咪一條條紋,而唔係起格老化,引擎同喉管嘅接駁位有無漏油情況、 Brake油係咪清澈而非混濁等。仲有好多人都忽略嘅冷氣喉,肉眼係睇唔到有無滲漏,但可以睇吓個鏡面夠唔夠清晰,有煙或者混濁即係代表損毀喇!」

 

 

 

■睇引擎同管喉接駁位,要如圖中般無漏油或油迹。 ■ Brake油要夠清,見 Brake油箱入面無混濁即屬正常。 ■睇喉身附有嘅鏡面清晰度就可判斷冷氣喉有無損壞。
■ Cam帶起格代表已經老化,換新帶條數都幾襟計。

■必睇里數錶,一般情況每年行車約1萬公里。以二手8年車為例,行約8萬公里則屬正常。

招數4 聽聲 㩒掣睇內櫳

試車最好係撻車揸出街試,唔得嘅話都有辦法 Check到質素,「上車千祈咪開冷氣,踩油聽吓引擎聲有無古怪同雜音,跟手試吓波箱,睇睇入波順唔順、有無跳波等,可判斷離合器有否老化。」 Chris更話最緊要多手,咩掣都 㩒吓,睇吓運作係咪正常。

 

易手判官

Chris(朱祖恩)係全港首創上門驗車嘅先鋒,「5年前見到好興網上二手車交易,又不時見積木車有交通意外,深感有責任保障道路使用者安全,所以就有上門驗車嘅構思。」睇住 Chris驗車成個法醫咁款,其實中立驗車,不偏袒買賣雙方,咁就至均真,收費都只係 $950。